زماااان.. من أكتر من ٣٠٠٠ سنة صحينا من النوم لقينا الهكسوس محتلين البلد.. اتمسكنوا لحد ما اتمكنوا.. وبعد ما كنا بنعطف عليهم سيطروا على مقاليد الأمور واحتلونا.. لكن طوال ٢٥٠ سنة احتلال هكسوسى.. عمرنا ما اتكلمنا هكسوسى.. وفى النهاية طردناهم.. وفضلنا عايشين.
بعد الهكسوس.. دخل الاشوريين.. واحتلونا ١٦ سنة.. ونفس الحكاية.. ما نطقناش حرف اشورى واحد.. ومشي الاشوريين.. وفضلنا عايشين
الفرس صعب عليهم ان الاشوريين يحتلوا مصر وهما لأ.. قاموا احتلونا يجى ٩٠ سنة.. وطلع الفرس من عندنا بيتكلموا عربى مكسر.. وفضلنا عايشين.
اليونانيين قالوا يعنى الفرس اللى بيعبدوا النار يحتلوا مصر واحنا لا ؟!.. فجهزوا الجيوش وهجموا على الفرس وطلعوهم.. وقعدوا مكانهم.. وكبر الاسكندر الأكبر عندنا ومات زى ما الكل حيموت.. وبرضو ما اتكلمناش يوناني ولا حاجة.. وفضلنا عايشين
بطليموس خليفة الاسكندر
قال يعنى الاسكندر أحسن منى.. وقام جايب الجيوش البطلمية وقعدوا عندنا يجى ٣٠٠ سنة.. ولا نطقنا حرف بطليموسى واحد.. وفضلنا عايشين.
الخواجه الروماني أكتافيوس ماعجبوش الوضع.. وقالك لأ.. أنا مش ابن البطة السودا.. وقام باعت جيوشه وقعد عندنا يجى ٣٦٠ سنة.. آكلين شاربين نايمين.. وفى النهاية ماتوا واندفنوا عندنا.. ولا اتغيرنا ولا نطقنا حرف اكتافيوسى واحد.. وفضلنا عايشين.
واحنا قاعدين بنعمل كوباية شاى على شط النيل.. ولسة حناخد بق من الكوباية.. لقينا البيزنطيين قاموا هاجمين على مصر واحتلونا ٣١٠ سنة.. وعااادى.. فضلنا قاعدين بنشرب الشاى ومابقيناش بيزنطيين ولا حاجة.. وفضلنا عايشين.
بعدها دخلنا فى الفتح الإسلامى.. وإشى دولة اسلاميه علي أموية على عباسية على طولونية علي اخشيدية علي فاطمية شيعية على ايوبية وفضلنا عايشين
المماليك.. عملوا الدولة المملوكية.. واحتلونا يجى ٣٠٠ سنة قاومو خلالها الصليبيين والمغول.. ورغم كدا ولا نطقنا حرف مملوكى واحد.. بالعكس هما اللى اتكلموا مصرى.. وفضلنا عايشين.
الفرنسيين والانجليز صعب عليهم شوية المماليك يستمتعوا بمصر ويحكموها ويسيطروا من خلالها على طرق التجارة.. قاموا سخنوا الاتراك سليم الأول.. وهجم على مصر.. وقتل الاتراك سلطان المماليك قنصوه الغورى وشنقوا طومان باى.. واحتلوا مصر.. وما اتكلمناش تركى ولا حاجة.. وفضلنا عايشين
ولما الاتراك شموا نفسهم.. دعم الانجليز محمد على وقلبوه على الأتراك.. وفضل هو وأولاده واحفاده فى مصر اكتر من ١٤٠ سنة.. وبسببهم شفط الانجليز خير البلد وخلونا متخلفين ومواطنين من الدرجة الخامسة.. لكن برضوا الحمد لله استحملنا.. ولا اتكلمنا ألبانى زى محمد على.. ولا تركى زى اللى عين محمد على.. بل بالعكس كل أولاد واحفاد محمد على هما اللى اتكلموا مصرى.. وفضلنا عايشين.
الفرنسيين قالوا يعنى هو احنا اللى مش حناخد من الدست مغرفة.. وقاموا داخلين مصر وقلبوا عيشهم ٣ سنين وخرجوا وهما بيتكلموا مصرى.. وفضلنا عايشين.
الانجليز شربوا شاى مع الفرنسيين.. وقسموا الدول على بعضهم.. فطلع الفرنسيين من مصر على دول المغرب العربى بعدينا بشارعين.. واحتل الإنجليز مصر ٧٢ سنة.. ورغم كدا لا اتكلمنا فرنساوي ولا انجليزى.. وكلهم خرجوا من عندنا.. وفضلنا عايشين.
حتى الصهاينة لما احتلوا سينا بمساعدة انجلترا وفرنسا واغتروا بقوتهم وقالوا انهم القوة التى لا تقهر.. فاقوا من الغيبوبة والمصريين فوق دماغهم.. وجريوا زى الفيران وانتهى وجودهم فى سينا.. وفضلنا عايشين.
إحنا اتبهدلنا كتير.. واستحملنا كتير.. وشفنا إللى ما حدش شافه.. وخضنا حروب على مدار التاريخ بعدد شعر رأسنا.. ورغم كدا فضلنا عايشين.
إللى شفناه كمصريين طول السنين إللى فاتت دى كلها كتير.. ورغم كدا صمدنا لأكثر من ١٥٠٠ سنة احتلال بأسماء وأشكال مختلفة.. وعرفنا بشكل كبير جدا نحفاظ على هويتنا ولغتنا وعاداتنا وتقاليدنا مقارنة بدول وممالك أخرى أندثرت وتلاشت واصبحت تراث..
تفتكروا بعد كل دا ممكن مصر تضيع ؟ أنا باقول مستحيل
البلد دى لسة فيها أسرار كتير..
وهى محفوظة منذ فجر التاريخ.. وستظل محفوظة ليوم الدين.. والارض التى كانت سكنا وممرا للانبياء والمرسلين.. والتى قال عنها الرحمن ادخلوها بسلام آمنين.. ستعود لها باذن الله مكانتها بفضل أبناءها المخلصين.
عشان كدا دايما باقول.. ما تخافوش.. ياما دقت ع الراس طبول.. وكل اللى فات راح وفضلنا عايشين.. ببركة رب العالمين
#مصر_ام_الدنيا.
0 تعليق