أعرب عدد من خريجى أولى دفعات جامعات الجلالة والعلمين والملك سلمان، عن سعادتهم بتخرجهم بعد قضاء سنوات الدراسة وكونهم أولى دفعات الجامعات الأهلية. وأوضحوا فى تصريحات لـ«الوطن» أن ما تحقق لهم من نظم دراسية حديثة وتدريبات علمية متميزة خلال فترة انضمامهم تؤكد أنهم على الطريق الصحيح للانخراط فى سوق العمل إقليمياً ودولياً.

«ياسين»: تخصصت فى اللوجيستيات والتجربة كانت حلوة جداً

وقال ياسين أحمد، خريج أول دفعة من برنامج اللوجيستيات وإدارة سلاسل الإمداد بجامعة الجلالة، والأول على دفعته على مدار الأربع سنوات: «لو هتكلم عن جامعة الجلالة، هقول إن التجربة كانت حلوة جداً، خاصة إن أنا كنت فى أول دفعة والجامعة كانت جديدة، وده مكنش سهل خالص، بس الجامعة قدرت توفرلى دكاترة بيساعدونى إنى أقدر أتكيف وأحب التخصص اللى أنا فيه، ده طبعاً غير مدير البرنامج اللى كان بيساعدنى دايماً ويوجهنى لاتخاذ القرارات الصح والمناسبة لتطوير أدائى ورفع مستواى».

وأضاف أن المناخ الأكاديمى والـcampus فى نفس مستوى الجامعات الدولية فى مصر، بجانب السوشيال لايف فى الجامعة التى كانت من أحسن الحاجات اللى مرت عليّا»، وتابع: «أنا دخلت تخصص اللوجيستيات وإدارة سلاسل الإمداد، وأهم سبب خلانى أختار التخصص ده إنه تخصص نادر ومش موجود فى جامعات كتير، والجامعة قدرت توفره، كمان هو من التخصصات المطلوبة جداً فى سوق العمل».

وقال محمد جمال، الطالب بكلية علوم الحاسب فى جامعة العلمين الدولية، إن احتفال الجامعات بحضور رئيس الوزراء فخر لجميع الطلاب، موضحاً أن «الجامعات الأهلية تتميز بأن الدكاترة اللى موجودين قادرين على أن يجعلوا من الطلاب شخصيات أخرى تحب التعليم والحياة، وحببونى أكتر فى التخصص وخلونى أهتم أكتر بالتعلم والفهم فى المجال ده، ده غير إن الجامعة وفرت لنا بيئة مناسبة وكورسات وتدريبات عشان نفهم أكتر ونزود من خبراتنا، وده يمكن يكون أهم سبب إنى تفوقت وفضلت الأول على دفعتى على مدار الأربع سنين اللى فاتوا».

«سارة»: دخلت بمنحة من الرئيس السيسى وكانت فرصة مميزة

وقالت سارة خالد، الحاصلة على بكالوريوس علوم الذكاء الاصطناعى من جامعة الجلالة وخريجة كلية حاسبات ومعلومات جامعة المنصورة: «‏اختيارى لجامعة الجلالة كان عن طريق إن أنا لقيت منحة مقدمة من الرئيس عبدالفتاح السيسى لخريجى الحاسبات والمعلومات والهندسة لدراسة الذكاء الاصطناعى بجامعة الجلالة الأهلية ومن خلالها الحصول على البكالوريوس فى علوم الذكاء الاصطناعى وطبعاً كانت فرصة مميزة».

وتابعت: «مجال دراستى كان علوم الذكاء الاصطناعى قسم مميز طبعاً لأن كل حاجة حالياً فى الدولة والمجتمع متجهة للذكاء الاصطناعى والبرمجة، وأنه يساعد البشر فى تأدية المهام بأقصى جودة، وإن ده المستقبل لمواكبة التطورات فى العالم».

وأضافت: «أنا عن نفسى كان تخصصى فى المنصورة قسم المعلوماتية الطبية، وبالتالى دراستى لعلوم الذكاء الاصطناعى ساعدتنى جداً إنى أدمج علم الذكاء الاصطناعى لخدمة النواحى الطبية، وبالتالى كمان سجلت الماجستير بتاعى فى الاكتشاف المبكر لمرض التصلب المتعدد بالذكاء الاصطناعى وبالتالى حماية الإنسان منه».

وقالت علياء عمر، خريجة جامعة الملك سلمان، إنها سعيدة بتخرجها فى أول جامعة أهلية فى سيناء، مضيفة: «طبعاً مفيش شك إن الثانوية العامة فى وقتنا كانت صعبة جداً بسبب فترة كورونا وتداعياتها، وإن فى الوقت ده واجهنا تحديات كتير أوى عشان نقدر نوصل لحلمنا، وساعتها كنت حسيت إن كل الأبواب اتقفلت قدامى لحد ما عرفت إن جامعة الملك سلمان وغيرها من الجامعات هتفتح فى السنة بتاعتى وهقدر أدخل التخصص اللى كنت عايزاه».